Henley sigraði á Honda Classic eftir mikla dramatík

Bandaríski kylfingurinn Russell Henley sigraði á Honda Classic mótinu sem lauk í kvöld á PGA-mótaröðinni í Flórída. Það er óhætt að segja að lokadagurinn í mótinu hafi boðið upp á gríðarlega dramatík en eftir 72 holur á PGA National vellinum voru fjórir kylfingar jafnir í efsta sæti á átta höggum undir pari. 

Mikið af mistökum

Rory McIlroy hafði leitt mótið nánast frá fyrstu holu en hann lék hræðilega í dag og kom inn á 74 höggum eða fjórum yfir pari eftir að hafa leikið síðustu 12 holurnar í mótinu á fimm yfir pari. Það dugði þó Norður-Íranum til þess að komst í bráðabana ásamt Ryan Palmer, Russell Knox og Russell Henry en allir þessir kylfingar áttu góðan séns á að klára mótið á seinni níu holunum í dag.

Það var þó mikið um taugaspennu og mistök en fjórmenningarnir sem komust í bráðabana léku allir seinni níu holurnar yfir pari og á tímabili leit einfaldlega út fyrir að enginn þeirra vildi sigra mótið.

18. holan var spiluð í bráðabananum en hún er rúmlega 500 metra par 5 hola. Þar fékk aðeins einn kylfingur fugl og var það bandaríska ungstirnið Russell Henley sem setti niður rúmlega meterspútt fyrir sigrinum en þetta er annað mótið sem þessi bráðefnilegi 24 ára kylfingur sigrar á PGA mótaröðinni.

Rory McIlroy á eflaust eftir að klóra sér í hausnum yfir því hvernig honum tókst að tapa niður forystunni í dag en á tímabili var hann með þriggja högga forskot á næstu menn. Tvöfaldur skolli á 16.holu og skolli á 17.holu kostuðu Norður-Írann mikið en hann hafði leikið nánast óaðfinnanlegt golf frá fyrsta degi í mótinu.

Woods hætti leik

Tiger Woods átti hræðilegan dag en hann hætti leik á 13. holu þegar að hann var fimm höggum yfir pari á hringnum. Hann gaf út tilkynningu í kjölfarið að meiðsli í baki hefðu gert honum erfitt fyrir og þess vegna hefði hann þurft að hætta leik. 

Næsta mót á PGA mótaröðinni er hluti af heimsmótaröðinni í golfi en öll stærstu nöfnin í golfheiminum munu etja kappi á Doral vellinum í Miami. Hefst mótið á fimmtudaginn næstkomandi en allir keppnisdagarnir munu verða í beinni útsendingu á Golfstöðinni.

Lokastaða efstu manna í mótinu:

1. Russell Henley -8 (e. bráðabana)

2.-4. Ryan Palmer -8

2.-4. Russell Knox -8

2.-4. Rory McIlroy -8

5. Billy Hurley III -7

6.- 7. David Hearn -6

6. -7. Will MacKenzie -6

8.- 10. Sergio Garcia -5

8.- 10. David Lingmerth -5

8. -10. Luke Donald -5

Post by Golfstöðin.