Hart sótt að Adam Scott á þriðja hring

Þriðji hringur á Arnold Palmer Invitational golfmótinu sem fram fer á Bay Hill vellinum í Flórída fór fram í gær en fyrir hringinn hafði ástralski kylfingurinn Adam Scott sjö högga forystu á næstu menn og mótið virtist nánast vera búið.

Það var þó hart sótt að Scott á þriðja hring en hann byrjaði hann mjög illa og fékk tvo skolla á fyrstu fimm holunum. Það nýttu nokkrir kylfingar sér í toppbaráttunni en um tíma var forysta hans komin niður í eitt högg. Hann tók sig þó saman í andlitinu á seinni níu holunum og kláraði hringinn á 71 höggi eða einu undir pari en hann er 15 höggum undir pari í mótinu.

Þrátt fyrir að Scott hafi tekist að bjarga þriðja hringnum sínum þá unnu margir keppendur á hann, meðal annars fyrrum PGA-meistarinn Keegan Bradley sem kom inn á 66 höggum í gær eða sex undir. Hann er í öðru sæti, þremur höggum á eftir Adam Scott á samtals 13 höggum undir.

Bandaríkjamennirnir Matt Every og Jason Kokrak eru jafnir í þriðja sæti á 12 undir pari en Chesson Hadley og Ítalinn Francesco Molinari eru á 11 höggum undir pari í fimmta sæti.

Það er því nóg af öflugum kylfingum sem gætu gert atlögu að Adam Scott í dag en hann hefur leitt mótið nánast frá byrjun. Bein útsending frá lokahringnum hefst á Golfstöðinni klukkan 16:30 í dag.