Garcia í forystu á Shell Houston Open

Sergio Garcia fór á kostum á öðrum hring Shell Houston Open sem fram fer í Texas en Spánverjinn lék á 65 höggum eða sjö undir pari. Hann er samtals á 12 höggum undir pari þegar að mótið er hálfnað en í öðru sæti kemur Bandaríkjamaðurinn sterki Matt Kuchar á 11 höggum undir. Nokkrir kylfingar eru jafnir í þriðja sæti á átta höggum undir pari.

Rory McIlroy er með á mótinu að þessu sinni en hann hefur farið rólega af stað og er á þremur höggum undir pari eftir hringina tvo. Phil Mickelson hélt líka áfram að spila vel eftir að hafa þurft að draga sig úr leik vegna meiðsla á Valspar meistaramótinu í síðustu viku en hann er sex undir pari og gæti með góðum hring í dag blandað sér í toppbaráttuna.

Á meðan að PGA mótaröðin stoppar í Texas eru allir bestu kvenkylfingar heims samankomnir á Mission Hills vellinum í Kalíforníuríki þar sem fyrsta risamót ársins í kvennagolfinu fer fram, Kraft Nabisco meistaramótið.

Þar leiða þær Se Ri Pak og Lexi Thompson eftir tvo hringi en þær eru samtals á sjö höggum undir pari. Thompson spilaði magnað golf í gær og kom inn á 64 höggum eða átta undir pari og verður hún því að teljast líkleg til afreka um helgina. Á eftir þeim kemur Michelle Wie á sex undir en á fimm undir, jafnar í fjórða sæti, eru þær Cristie Kerr og Shanshan Feng.

Hin 15 ára gamla Bandaríkjastúlka, Angel Yin, sem var í toppbaráttunni eftir fyrsta hring og vakti mikla athygli áhorfenda lék annan hringinn sjö höggum yfir pari og spilaði sig nánast út úr mótinu.

Mikil veisla verður á Golfstöðinni um helgina en sýnt verður beint frá bæði Shell Houston Open og Kraft Nabisco meistaramótinu. Hefst bein útsending frá Texas klukkan 17:00 í dag en klukkan 22:00 hefst bein útsending frá Kraft Nabisco.