Freyr skoraði þrennu í stórsigri Þróttar V

Fyrstu umferð Borgunarbikarsins lauk í dag með fjórum leikjum.

Handboltamaðurinn fyrrverandi Freyr Brynjarsson skoraði þrennu þegar Þróttur Vogum vann stórsigur, 8-0, á Stál-úlfi. Þróttarar byrjuðu leikinn af miklum krafti og skoruðu fjögur mörk á fyrstu 16 mínútum leiksins. Seinni fjögur mörkin komu svo á sex mínútna kafla undir lok leiksins.

ÍR þurfti framlengingu til að leggja 4. deildar-lið Hvíta riddarans að velli. Staðan var jöfn, 1-1, að loknum venjulegum leiktíma, en í framlengingunni reyndust Breiðhyltingar sterkari og sigruðu að lokum 4-1.

Ægir vann Reyni Sandgerði 3-2 á útivelli í slag tveggja 2. deildar liða. Darko Matejic skoraði tvö mörk fyrir Ægi og Ágúst Freyr Hallsson eitt. Þorsteinn Þorsteinsson skoraði bæði mörk Reynis.

Þá höfðu Berserkir betur gegn Lummunni með sex mörkum gegn þremur.