Ragnar Már vann á Hellu | Fékk níu fugla

Frábær lokahringur Ragnars Más Garðarssonar, GKG, skilaði honum sigri á öðru móti Eimskipsmótaraðarinnar í golfi.

Það fór fram á Hellu um helgina en Ragnar Már var ekki á meðal þriggja efstu keppendanna fyrir lokahringinn í dag.

Hann lék hins vegar á als oddi í dag og kom í hús á 62 höggum eða átta undir pari vallarins. Hann var samtals á tveimur höggum undir pari eftir hringina þrjá en fékk alls níu fugla og einn skolla í dag.

Gísli Sveinbergsson, GK, kom næstur á pari eftir hringina þrjá en hann spilaði á 67 höggum, þremur undir pari vallarins, í dag.

Fannar Ingi Steingrímsson, GHG og Heiðar Davíð Bragason, GHD komu svo næstir á tveimur höggum yfir pari. Haraldur Franklín Magnús, GR, varð fimmti á þremur yfir.

Í kvennaflokki bar Berglind Björnsdóttir, GR, sigur úr býtum þrátt fyrir að hafa ekki náð sér á strik í dag. Hún spilaði á sjö yfir pari og endaði á níu yfir pari.

Hún var einu höggi á undan Guðrúnu Brá Björgvinsdóttur, GK, sem spilaði á tveimur höggum yfir pari á lokahringnum í dag. Fimm kylfingar deildu svo þriðja sætinu en Sunna Víðisdóttir, Íslandsmeistarinn og sú sem vann fyrsta mót Eimskipsmótaraðarinnar um síðustu helgi, endaði í tíunda sæti.

Nánari úrslit má finna á golf.is.