Martin Kaymer lék best á fyrsta hring á US Open

Þjóðverjinn Martin Kaymer leiðir US Open eftir fyrsta hring en þessi 29 ára kylfingur lék Pinehurst völl nr.2 á 65 höggum eða fimm höggum undir pari. Völlurinn var gríðarlega erfiður viðureignar í dag og því er skor Kaymer afar gott en hann á þrjú högg á næstu menn sem koma á tveimur höggum undir pari.

Það eru þeir Kevin Na, Brendon De Jonge og Graeme McDowell en sá síðastnefndi virðist ávalt finna sitt besta form þegar að US Open fer fram. Margir sterkir kylfingar eru ekki langt undan á einu höggi undir pari, meðal annars Keegan Bradley, Jordan Spieth, Brandt Snedeker, Henrik Stenson og hinn högglangi Dustin Johnson.

Þá eru einnig margir á sléttu pari eins og Phil Mickelson, Ian Poulter og Rickie Fowler en ljóst er að Pinehurst völlur nr.2 á eftir að verða gríðarlega erfiður næstu daga og greinilegt að bestu kylfingar heims eiga stóra áskorun fyrir höndum eftir því sem líður á mótið.

Rory Mcilroy byrjaði sæmilega, lék fyrsta hring á 71 höggi eða einu yfir pari og er jafn í 37.sæti ásamt mörgum öðrum.

Annar hringur verður í beinni útsendingu á Golfstöðinni á morgun frá klukkan 17:00.