Tiger Woods er úr leik á Congressional

Tiger Woods náði ekki niðurskurðinum á Quicken Loans National mótinu sem fer fram á hinum sögufræga Congressional velli en Woods lék fyrstu tvo hringina á sjö höggum yfir pari. Hann var fjórum höggum frá því að ná niðurskurðinum en þetta er fyrsta mótið sem Woods tekur þátt í eftir þriggja mánaða fjarveru vegna skurðarðgerðar sem hann fór í á baki.

Þrátt fyrir að hafa misst af niðurskurðinum sagði Woods við fréttamenn eftir hringinn að hann væri nokkuð ánægður með spilamennsku sína en að hann þyrfti að koma sér í betra leikform til þess að berjast við þá bestu.

Marc Leishman, Oliver Goss, Ricky Barnes og Patrick Reed leiða mótið eftir tvo hringi en þeir deila allir fyrsta sætinu á sex höggum undir pari. Margir þekktir kylfingar eru skammt undan en hægt verður að fylgjast með beinni útsendingu frá þessu skemmtilega móti á Golfstöðinni frá klukkan 17:00 á morgun.