"Þetta er eins og risastór sími!“

Í nýjum þætti af REACT frá Fine Brothers Productions á YouTube sjáum við viðbrögð krakka á ýmsum aldri þegar þau fá leikjatölvuna Game Boy í hendurnar.

Sumir þeirra hafa aldrei heyrt á tölvuna minnst á meðan nokkrir hafa heyrt um Game Boy frá foreldrum sínum.

Viðbrögðin þegar ungmennin prófa tölvuna í fyrsta sinn eru vægast sagt stórkostleg og eru þau flest sammála um að tækið sé í stærra lagi miðað við þær leikjatölvur sem tíðkast í dag.

Game Boy er ferðaleikjatölva frá Nintendo sem kom fyrst á markaðinn árið 1989. Tölvan vakti gríðarlega lukku í Bandaríkjunum og seldust milljón tölvur á nokkrum vikum þegar hún fór fyrst í sölu.