Eldurinn kviknaði í Þvottahúsi Fannar

Þorvarður Helgason, verkstjóri hjá Fönn, segir að upptök eldsins, sem kviknaði um kvöldmatarleytið í Skeifunni í Reykjavík í kvöld, hafi verið í þvottahúsi efnalaugarinnar. Allt lið slökkviliðsins á höfuðborgarsvæðinu var kallað út upp úr klukkan átta vegna eldsvoðans.

„Svo virðist sem eldurinn hafi komið upp í þvottahúsinu hjá okkur,“ segir Þorvarður í samtali við Vísi. Eldsvoðinn í kvöld hefur vart farið framhjá nokkrum manni enda sérst reykurinn allt frá Akranesi og vel suður á Reykjanes.

„Það var unnið í þvottahúsinu í dag en enginn var við störf þegar eldurinn kom upp. Þar er náttúrulega mikill eldsmatur, þar sem við erum að þvo lín fyrir hótel og öldrunarheimili," segir Þorvarður.