BÍ/Bolungarvík og Grindavík með góða útisigra

BÍ/Bolungarvík og Grindavík unnu bæði góða útisigra í 1. deild karla í fótbolta í kvöld, BÍ/Bolungarvík sótti þrjú stig í Ólafsvík en Grindvíkingar fóru í góða ferð norður og unnu 2-1 sigur á KA. Bæði lið þurftu nauðsynlega á stigunum að halda enda bæði við botn deildarinnar.

Liðsmenn BÍ/Bolungarvíkur steinlágu 6-0 á móti ÍA fyrir aðeins fjórum dögum en komu sterkir til baka í 4-2 sigri á Ólafsvíkur-Víkingum á Snæfellsnesinu í kvöld.

Eyþór Helgi Birgisson kom Víkingi Ólafsvík í 1-0 í fyrri hálfleik en Djúpmenn skoruðu fjögur mörk í seinni hálfleiknum. Andri Rúnar Bjarnason og Nikulás Jónsson komu BÍ/Bolungarvík í 2-1 en Steinar Már Ragnarsson jafnaði fyrir Víking.

Mark frá Mark Tubæk og sjálfsmark Tomasz Luba á síðustu tíu mínútunum tryggðu Djúpmönnum 4-2 útisigur og þrjú stig.

Grindavík vann 2-1 sigur á KA en KA-menn voru fyrir leikinn búnir að vinna þrjá leiki í röð. Alex Freyr Hilmarsson skoraði sigurmark Grindavík 22 mínútum fyrir leikslok eftir að KA-menn höfðu jafnað með marki Jóhanns Helgasonar. Magnús Björgvinsson kom Grindavík í 1-0 í fyrri hálfleiknum.

Upplýsingar um markaskorara eru fengnar af úrslitasíðunni öflugu úrslit.net.