22 laxar komnir úr Korpu

Það er búin að vera ágætis veiði í Korpu frá því að hún opnaði en á 9 dögum eru komnir 22 laxar á tvær stangir.

Nokkuð líf hefur verið á neðstu stöðunum en veiðistaðirnir þar eru Pallurinn, Berghylur og Foss og gefa þeir gjarnan mestu veiðina þegar tímabilið hefst en þegar jafn mikið og gott vatn er í ánni og nú er laxinn mjög fljótur að fara upp ánna og það er ekki óalgengt að setja í laxa í Stíflu nokkrum dögum eftir opnun.  Nokkuð af laxi hefur dreift sér um ánna og á kvölgöngu í gær fundust laxar á Breiðu, Þjófahyl, Göngubrúarhyl, Símastreng og nokkrir voru líka í Leyningum.  Þar sem áin er ekki vatnsmikil og aðgengi gott hefur hún notið mikilla vinsælda hjá byrjendum og fjölskyldufólki sem vill eiga möguleika á að ungir veiðimenn setji þarna í Maríulax en þær eru ekki margar árnar sem státa af jafn mörgum Maríulöxum á hverju sumri eins og Korpa og Elliðaár.