Bílar

Forstjóri Nissan með 1.515 milljónir í laun

Finnur Thorlacius skrifar
Carlos Ghosn forstjóri Renault-Nissan.
Carlos Ghosn forstjóri Renault-Nissan.
Carlos Ghosn, forstjóri Nissan og Renault fékk 1.515 milljón króna í laun á síðasta uppgjörsári sem lauk 31. mars síðastliðinn.  Hann fékk 10 milljónir bandaríkjadala frá Nissan og 3,13 milljónir dala frá Renault.

Hann er fyrir vikið hæst launaði forstjóri japanskra bílaframleiðenda og er með fjórföld laun forstjóra Toyota þrátt fyrir að hagnaður Toyota hafi verið fimm sinnum meiri á uppgjörsárinu. Carlos Ghosn hefur verið með hæstu laun forstjóra japanskra bílaframleiðenda í þrjú af síðastu fjórum árum.

Það vekur upp spurningar af hverju Ghosn er enn svo hátt launaður í ljósi þess að hagnaður Nissan jókst minnst allra japanskra bílaframeiðenda á síðasta ári, eða aðeins um 0,7%. Þrátt fyrir að Ghosn sé með há laun eru kollegar hans í Evrópu og Bandaríkjunum margir hverjir með hærri laun.

Alan Mulally forstjóri Ford var með 2.620 milljónir í laun í fyrra og Mary Barra forstjóri GM var með 1.640 milljónir króna. Martin Winterkorn forstjóri Volkswagen var með 2.280 milljónir, en Dieter Zetsche forstjóri Mercedes Benz 1.250 milljónir króna. Allir eiga því þessir forstjórar fyrir salti í grautinn, þó talsvert muni á þeim. 

Mest lesið




×

Mest lesið