Búið að raða í holl fyrir Opna breska

Opna breska meistaramótið hefst á fimmtudaginn en með endurkomu Tiger Woods á golfvöllinn eru öll stærstu nöfnin í golfinu með að þessu sinni.

Mótið fer fram á Royal Liverpool vellinum í Hoylake á Englandi en síðast þegar að mótið var haldið á vellinum sigraði Woods með glæsibrag og tileinkaði nýlátnum föður sínum sigurinn á eftirminnilegan hátt.

Búið er að raða í holl fyrir mótið en eins og alltaf verða nokkur holl meira spennandi en önnur. Þar má helst nefna að Tiger Woods leikur með Henrik Stenson og Angel Cabrera á meðan að Rory McIlroy spilar með Hideki Matsuyama og Jordan Spieth.

Besti kylfingur heims, Adam Scott, leikur fyrstu tvo hringina með Justin Rose og Jason Dufner en ríkjandi meistari, Phil Mickelson, fær að njóta návistar Ernie Els og Masters meistarans Bubba Watson. Rástíma og holl allra keppenda má nálgast hér.

Allir fjórir dagarnir á Opna breska meistaramótinu verða sýndir í heild á Golfstöðinni en bein útsending frá fyrsta hring hefst á fimmtudaginn klukkan 08:00.