Kolbeinn Höður og Jóhann Björn úr leik

Norðlensku spretthlaupararnir Kolbeinn Höður Gunnarsson og Jóhann Björn Sigurbjörnsson eru báðir úr leik í 200 metra hlaupi karla á HM 19 ára og yngri í Eugene í Bandaríkjunum.

Kolbeinn Höður keppti í fjórða riðli og varð þriðji í sínu hlaupi. Hann var á eftir Kúbumanninum Yaniel Carrero þegar 50 metrar voru eftir, en átti góðan endasprett og tryggði sér þriðja sætið á 21,44 sekúndum.

Jóhann Björn keppti í áttunda riðli af níu og hafnaði í fimmta sæti, en hann hljóp á 21,59 sekúndum og var 1/100 á eftir Zambíumanninum BrianKasinda.

Efstu tveir í hverjum riðli komust áfram í undanúrslitin ásamt sex bestu tímunum og voru þeir ekki þar á meðal.

Íslendingar eiga tvo keppendur sem komust í úrslit. AnítaHinriksdóttir keppir í úrslitum í 800 metra hlaupi í nótt og Hilmar Örn Jónsson í sleggjukasti aðra nótt.