Ennþá mikið vatn í Hörgá

 Ein af skemmtilegri silungsám á norðurlandi, Hörgá, er ennþá mjög vatnsmikil enda er snjóbráð mikil þessa dagana í hlýindunum fyrir norðan.

Það er ennþá nokkur snjór mjög neðarlega í giljum og brekkum fyrir norðan og nyrst á Tröllaskaga er ennþá mikil snjór í fjöllum.  Þetta gerir það að verkum að árnar sem fá snjóbráð eru mjög vatnsmiklar og fljótar í lit ef það verður mjög hlýtt.  Veiðin þar af leiðandi er búin að vera mjög róleg t.d. í Hörgá, Svarfaðardalsá og Ólafsfjarðará en veiðin í júlí en yfirleitt meira en helmingur af sumarveiðinni.  En ekki líta á þetta sem vonlausa stöðu eða fiskleysi, þvert á móti.  Þeir sem eiga bókað leyfi í ágúst þegar snjóbráðin fer að minnka ættu að vera í toppmálum því þegar árnar hreinsa sig og lækka fer bleikjan oft í feyknarlega gott tökustuð og þá er ekkert leiðinlegt að vera við bakkana þar nyrðra.