110 sm lax úr Laxá í Aðaldal í morgun

Á sama tíma og veiðimenn eru áþreifanlega varir við skort á smálaxi er líklega eitt besta stórlaxa ár margra ánna að gerast einmitt í sumar.

Laxá í Aðaldal hefur til að mynda sjaldan síðustu 10 ár átt jafn mikið af löxum sem eru yfir 15 pund.  Veiðihlutfallið er líklega um 80% stórlax, og þá er ekki verið að tala um tveggja ára laxa heldur alvöru stórlaxa sem margir eru að koma í ánna í þriðja eða fjórða skipti.   Einn slíkur stórlax líklega sá stærsti í sumar, veiddist í morgun í Laxá í Aðaldal og kom hann upp af Nessvæðinu.  Laxinn veiddist í Hólmavaðsstíflu og mældist 110 sm langur og eins og sést á meðfylgjandi mynd er hann þykkur eftir því.  Það var Gunnar Arngrímur Arngrímsson sem landaði laxinum og fékk aðstoð leiðsögumannsins Hermóðs Hilmarssonar við að ná honum á land.  Laxinn er líklega einn stærsti laxinn í sumar en nokkrir slíkir hafa sést í Laxá í sumar en flestir hafa þeir haft betur í viðureignum við veiðimenn.  En þeir laxar sem hafa sloppið eru allir miklu stærri en þessi…..hvað annað?