Nýir straumar í tónlist hennar hafa þó ekki verið mikið til umræðu vestanhafs eftir að myndbandið kom út heldur hefur Swift verið ásökuð um kynþáttahatur. Er hún sögð ýta undir staðalímyndir um svart fólk með myndbandinu. Blaðakonan Amy Zimmerman lýsti yfir skoðun sinni á myndbandinu á The Daily Beast fréttamiðlinum. Hún telur að í myndbandinu séu hugsanlega skaðlegar staðalímyndir þar sem litaðir dansarar eru notaðir sem eins konar „leikmunir“.
Þetta er ekki í fyrsta skipti sem hvítar poppstjörnur hafa verið ásakaðar um að framfleyta staðalímyndum um kynþætti en söngkonurnar Miley Cyrus, Lily Allen og Sky Ferreira voru einnig ásakaðar í ár um að nota fólk af öðrum kynþáttum sem „leikmuni“ á sviði eða í myndböndum.
Rapparinn Earl Sweatshirt úr rapp- og listahópnum Odd Future gagnrýndi Swift á Twitter-síðu sinni, þó að hann sagðist reyndar ekki hafa þurft að sjá myndbandið til að geta gagnrýnt það. „Ég þarf ekki að sjá myndbandið til að segja ykkur frá því að það er í eðli sínu særandi og einfaldlega skaðlegt að framfleyta staðalímyndum um svarta fyrir þann sama markhóp hvítra stúlkna sem felur eigin fordóma með því að segjast elska menningu okkar. Til dæmis þau ykkar sem hræðast svart fólk en elska að það sé allt í lagi fyrir ykkur að „twörka“ eða segja „nigga“ árið 2014.“
Blaðamaðurinn Forrest Wickman á Slate.com er ósammála þessu og segir að myndbandið eigi að vera „vandræðalegt“ og að með þessu vilji Swift segja að hún geti aldrei notað hluti eins og „twörk“, sem eiga uppruna sinn hjá öðrum menningarhópum, og gert það á sannfærandi hátt.
Hingað til hefur Swift ekki svarað þessum ásökunum. En er myndbandið rasískt? Dæmi hver fyrir sig:
