Ágæt veiði í Svarfaðadalsá

Á fréttavef Stangaveiðifélags Akureyrar kemur fram að ágætlega hafi gengið í Svarfaðardalsá í sumar þrátt fyrir að sumarið hafi byrjað með miklum vatnavöxtum.

Veiðimenn sem voru á svæði 3 í ánni um miðjan þennan mánuð og gerðu góða veiði.  Allt voru þetta vænar bleikjur, flestar um 2 pund en uppí 4,5 pund.  Alls hafa nú verið skráðar 174 bleikjur á svæði 3 í Svarfaðardalsá en reikna má með að einhver afli sé óskráður.  Öll svæði árinnar eru opin til 10.september svo enn gefst þeim sem langar að kíkja í Svarfaðardalinn í sumar kostur á því.  Óseldum stöngum á efstu svæðunum fer nú hratt fækkandi svo það er ekki eftir neinu að bíða.  Veiðin í sjóbleikjuánum fyrir norðan hefur annars verið mun lakai en í fyrra og er þar ekki endilega lélegum göngum um að kenna en árnar voru mjög vatnsmiklar fram í byrjun ágúst sem gerði marga veiðistaðinu óveiðanlega.  Þeir sem kunna að lesa í vatnið og sjá hvert fiskurinn færir sig við þessar aðstæður hafa margir gert mjög góða veiði, t.d. í Hörgá en hún hefur verið mjög vatnsmikil í mest allt sumar.