Tók klarínett fram yfir handboltann

„Þetta er búið að koma pínu á óvart, en samt ekki því maður veit alveg hvað maður getur í golfi,“ segir Kristján Þór Einarsson, Íslandsmeistari í holukeppni og sigurvegari í einvíginu á Nesinu.

Kristján Þór hefur verið frábær á golfvellinum í sumar, en hann vann Eimskipsmótaröðina þegar eitt mót var enn eftir af henni.

Arnar Björnsson var með mjög áhugaverða umfjöllun í íþróttafréttum Stöðvar 2 í kvöld um þennan ágæta kylfing sem var á yngri árum afreksmaður í golfi, handbolta og fótbolta.

„Hann var nagli og sennilega ekki gott að vera í liðinu á móti honum en því betra að vera með honum. Hann á líka einstaklega góðan föður sem fylgdi okkur hvert fótspor og var duglegur að taka upp myndbönd sem gaman er að skoða í dag,“ segir RúrikGíslason, landsliðsmaður í fótbolta, um Kristján Þór.

Þeir spiluðu saman í 4. flokki HK sem varð fyrsta Íslandsmeistaralið félagsins fyrir rúmum áratug.

Í þessu tæplega tíu mínútna innslagi kennir ýmissa grasa, en Kristján Þór ræðir meðal annars um móðurmissinn, fjölskylduna, atvinnumennskuna og þegar hann þurfti að taka tónlistarferð fram yfir handboltann.