Yfir ein og hálf milljón heimsókna

Rúmlega ein og hálf milljón hefur heimsótt síðu Mílu, livefromiceland.is frá því Míla setti upp vefmyndavélar við Vaðöldu með útsýni yfir Bárðarbungusvæðið og kom þeim í loftið.

Þetta kemur fram í tilkynningu frá Mílu. Þar kemur fram að á þessum tveimur vikum sem liðnar séu, hafa alls um 1.520.000 heimsóknir verið síðuna, og á föstudag 29. ágúst voru heimsóknir flestar eða alls rétt tæpar 422.000 á einum sólarhring, frá miðnætti til miðnættis.

Flestar heimsóknir komu frá Evrópu og Ameríku, en aðeins 20% heimsókna eru frá íslenskum notendum sem er þó dágóður fjöldi eða um 300 þúsund.

Fyrsta vefmyndavél Mílu var sett upp í Eyjafjallagosinu árið 2010. þá voru öll met slegin í heimsóknum á eina síðu.

Síðan hafa margir vanið komur sínar á síðuna til að fylgjast með vefmyndavélunum þann tíma sem liðinn er frá síðasta gosi.