Eldgosið flokkað með Vesúvíusi og St. Helens

Eldgosið nafnlausa norðan Vatnajökuls er nú komið í flokk með meiriháttar eldgosum sem verða á jörðinni. Að sögn vefsíðunnar Volcano Discovery telst það nú af stærðinni 5, samkvæmt mælikvarða bandarísku jarðfræðistofnunarinnar, en slík gos eru sjaldgæf og verða jafnaði einu sinni eða sjaldnar á hverjum áratug á jörðinni. 

Click here for an English version.

Eldstöðin við Dyngjujökul er þar með komin í flokk með nokkrum af frægustu eldgosum mannkynssögunnar, eins og gosinu í Vesúvíusi á Ítalíu árið 79 eftir Krist, sem eyddi borginni Pompei, og stórgosinu í St. Helens í Washington-ríki í Bandaríkjunum árð 1980, sem kostaði 57 manns lífið. 

Stærðarflokkunin miðar við rúmmál gosefna sem eldgosið sendir frá sér. Í næsta flokki fyrir ofan, flokki sex, eru meðal annars Krakatoa-gosið árið 1883 og Pinatubo-gosið árið 1991. Í flokki sjö, þeim næstefsta, er Tambora-gosið árið 1815. Mannkynið hefur hins vegar ekki ennþá orðið vitni að gosi í áttunda og efsta flokki, en þar er meðal annars gos sem talið er hafa orðið í Yellowstone fyrir 640 þúsund árum. 

Í næsta flokki fyrir neðan, flokki fjögur, er meðal annars eldgosi í Eyjafjallajökli árið 2010.

Click here for volcano news in English.