Tólf finnskir draumar

Sýning á líkönum af verðlaunatillögum finnsku arkitektanna Kimmo Friman og Esa Laaksonen verður opnuð í dag í Norræna húsinu.

„Þetta eru tólf verkefni sem voru aldrei byggð og eru því bara draumar,“ segir Katrín Ragnars, arkitekt og starfsmaður Norræna hússins, um sýningu finnsku arkitektastofunnar Friman.laaksonen AB sem verður opnuð í dag klukkan 16 í anddyri Norræna hússins. Þar má sjá tillögur stofunnar að verkum sem hafa hlotið fyrstu og önnur verðlaun í arkitektasamkeppnum, líkön, teikningar og ljósmyndir.

Sýningin ber heitið 12 draumar arkitekta og við opnunina verður einnig haldinn fyrirlestur í tengslum við hana.

Þeir Friman og Laaksonen eru báðir á staðnum. Laaksonen er núverandi forstjóri Alvar Aalto-akademíunnar í Finnlandi og ritstjóri ptah, tímarits um arkitektúr, hönnun og listir. Hann sat í dómnefnd um Íslensku byggingarlistarverðlaunin 2007.