Erró fyrir Harro

Tvær sýningar verða opnaðar í Listasafni Reykjavíkur – Kjarvalsstöðum á laugardaginn kl. 16, sýning á verkum finnska listamannsins Harros og sýning Hildar Ásgeirsdóttur Jónsson á veggteppum sem ber heitið Úr iðrum jarðar.

Þetta er ekki fyrsta einkasýning Hildar, en hún hefur haldið þrjár einkasýningar hér á landi og fleiri í Bandaríkjunum þar sem hún stundaði nám.

„Ég er búin að vera í vefnaði síðan ég útskrifaðist úr textíldeild í Bandaríkjunum árið 1995 og hef unnið í þessu allar götur síðan,“ segir hún.

„Innblásturinn í verkin fæ ég úr íslensku landslagi, en verkin eru abstrakt og ég dreg bara það úr landslaginu sem mér finnst áhugavert, liti og formlínur sem spila saman,“ útskýrir Hildur. Verk Hildar eru sérstök að því leyti að hún málar á þræðina áður en hún vefur þau á vefstól.

„Þetta er samblanda af vefnaði og málverki,“ bætir hún við.

Ásamt Hildi opnar hinn finnski Harro sýningu, en á móti kynnir Listasafnið í Turku í Finnlandi verk hins íslenska Errós fyrir Finnum.

Harro og Erró hafa báðir lagt fram mikilvægan skerf til sögu samtímalistarinnar. Á sýningunni verður sjónum aðallega beint að popplistaverkum Harros frá árunum 1968 til 1972, en þau ollu uppnámi þegar þau voru fyrst sýnd í Finnlandi, en í verkunum byggir hann meðal annars á finnska fánanum, á vörumerkjum alþjóðlegra fyrirtækja og svínum svo eitthvað sé nefnt.