Uppáhaldslögin úr nótnabunkanum

„Við bjóðum upp á fjölbreytta tónlistardagskrá sem inniheldur gospel, þjóðlög, popplög og dægurlög,“ segir Hilmar Örn Agnarsson, stjórnandi Vox Populi, um afmælistónleika kórsins í Grafarvogskirkju á sunnudag.

„Sá háttur var hafður á við lagaval að kórfélagar fengu að velja sín uppáhaldslög úr nótnabunka síðustu ára,“ heldur stjórnandinn áfram, „því ættu þeir sem hafa fylgt okkur eftir í gegnum tíðina að kannast við nokkur lög.“

Vox Populi-kórinn var stofnaður 9. september 2008 og þetta er því fimmta starfsár hans. Grafarvogssöfnuður er 25 ára á þessu ári og því eru þetta tvöfaldir afmælistónleikar, að sögn Hilmars Arnar.

Einsöngvarar koma úr röðum kórsins og Tríó Kjartans Valdemarssonar spilar undir.

Miðasala er á midi.is og við innganginn á tónleikadaginn. Miðaverð er 2.500 krónur en frítt fyrir 12 ára og yngri.