Puttarnir fá að kenna á því

„Aðalmyndirnar höfum við unnið saman en sýnum líka það sem við gerum hvor í sínu lagi,“ segir Edda Lilja Guðmundsdóttir textílkennari um sýninguna Saumað í myndlist sem hún og föðursystir hennar, Hlíf Leifsdóttir, opna í Gerðubergi á sunnudag klukkan 14. Það er Hlíf sem málar og Edda Lilja saumar.

„Elsta myndin okkar sameiginlega er frá 2011 eða 2012. Aðferðin var dálítið lengi að malla þar til við fórum á flug,“ segir Edda Lilja.

Hún viðurkennir að erfiðara sé að sauma í strigann en efnisbút eða stramma.

„Ég get ekki farið niður og upp með nálina í sama skrefinu en finn mér leiðir og nálar sem duga. Fingurbjörg? Nei, ég hef aldrei getað notað fingurbjörg svo puttarnir fá bara að kenna á því.“

Edda Lilja kveðst bæði sauma í myndir frænku sinnar og og nota alls konar garn eftir því hvaða áferð og litir henti. Svo kroti hún aðeins í þær með tússi.

„En Hlín sýnir hrein málverk líka og ég fáeinar flíkur með frjálsum aðferðum.“

Þær frænkur vinna myndirnar til skiptis að sögn Eddu Lilju.

„Svo eru þarna nokkrar gamlar myndir sem Hlíf var lengi búin að eiga uppi í skáp og ég fékk til að leika mér með þegar við vorum að byrja. Við ákváðum að taka þær með.“

Sýningin stendur til 20. júní og er opin frá klukkan 9 til 17 virka daga og 13 til 16 um helgar.