Eins og að fella sig við það að labba

Norma Dögg Róbertsdóttir og Bjarki Ásgeirsson stóðu ekki aðeins efst á palli í fyrsta sinn heldur enduðu þau bæði langar sigurgöngur á Íslandsmótinu í fimleikum um helgina. Norma Dögg stöðvaði sigurgöngu Thelmu Rutar Hermannsdóttur og Bjarki varð fyrsti meistari Ármenninga í 19 ár.

Stoltir Ármenningar

„Síðustu ár hefur mig langað svakalega mikið til að vinna þetta, stundum hef ég ekki verið nógu góður en stundum kom eitthvað upp á,“ sagði Ármenningurinn Bjarki Ásgeirsson, sem vann fjölþraut karla en í 2. sæti varð Valgarð Reinhardsson úr Gerplu.

„Nú gekk allt upp og þetta var algjör draumur. Ólafur Garðar Gunnarsson (fráfarandi Íslandsmeistari) var ekki með og þetta hefði verið miklu erfiðara ef hann hefði verið með,“ sagði Bjarki. Þetta var góð helgi fyrir Ármenninga sem héldu mótið að þessu sinni.

Íslandsmeistarinn Bjarki Ásgeirsson og Jón Sigurður Gunnarsson unnu saman gull á fjórum áhöldum í gær. „Við Ármenningarnir unnum fjögur gull saman og göngum mjög stoltir frá þessu móti,“ sagði Bjarki.

Átti ekki von á þessu

„Ég stefndi á þetta en átti samt engan veginn von á þessu,“ sagði Norma Dögg Róbertsdóttir úr Gerplu, sem vann fjölþraut kvenna á laugardaginn. Norma bætti síðan við gulli í stökki í gær.

„Ég held að stökkið hafi skilað mér sigrinum í fjölþrautinni því ég er með aðeins sterkari stökkæfingu en hinar,“ segir Norma, sem stöðvaði sigurgöngu Thelmu Rutar Hermannsdóttur. „Thelma stóð sig mjög vel en smá mistök kostuðu hana titilinn í ár, sem er mjög leiðinlegt,“ sagði Norma og fann til með liðsfélaga sínum.

Gerpla átti þrjár efstu konur í fjölþrautinni, því Agnes Suto varð önnur og Thelma þriðja. Þær þrjár unnu síðan gullin á einstökum áhöldum „Við náum samt að vera vinkonur á æfingum sem skiptir rosalega miklu máli. Þetta er eins og önnur fjölskylda og það eru allir ánægðir fyrir hönd hinna,“ segir Norma.

Fínt að vera jöfn Berglindi

Thelma hefði getað orðið fyrsta konan til að vinna fjölþrautina sex sinnum sem og að vinna hana fimm ár í röð. „Ég get sagt að ég hafi hrasað smá tvíslánni. Ég rann aðeins af með höndina í mjög léttri æfingu sem kostaði sitt. Ég komst samt í úrslit á tveimur áhöldum og náði gullinu á báðum stöðum,“ segir Thelma, sem vildi ekki gera mikið úr pressunni vegna metsins.

„Er ekki bara fínt að vera jöfn henni Berglindi (Pétursdóttur). Hún er gamli þjálfarinn minn og svona,“ sagði Thelma Rut létt.

„Það kemur fyrir því að maður getur ekki alltaf átt fullkominn dag. Þetta var eins og að fella sig við það að labba,“ lýsir Thelma Rut mistökunum, sem kostuðu hana titilinn í fjölþraut.

„Þetta var bara algjörlega hundrað prósent óheppni,“ sagði Thelma Rut. Hún vill ekkert gefa upp hvort hún reyni við sjötta titilinn á næsta ári.

„Ég er að vera 21 árs og er að fara að byrja í háskóla næsta haust. Það tekur sinn toll og ég verð bara að sjá hvernig það spilast,“ sagði Thelma að lokum.