Asíuveisla í apríl á Café Lingua

Hægt verður að skyggnast inn í víetnamskan og japanskan tungumála- og menningarheim á þeim samkomum sem fram undan eru í apríl á Café Lingua.

Ekki síst má kynnast fjölbreyttum tungumálafjársjóði Filippseyja en þar eru töluð á milli 150 og 175 tungumál. Einnig er indversk bíómynd í Bíói Paradís á dagskrá.

Fyrsta uppákoma mánaðarins verður á mánudaginn, 7. apríl, klukkan 17.30 í aðalsafninu, Tryggvagötu 15. Þá mun Lieu Thúy Thi bera saman íslenska tungumálið og það víetnamska og segja frá hefðum og siðum í Víetnam, en landið á sér langa og ríka sögu.

Lieu mun bjóða upp á víetnamskt kaffi og íslenskar kleinur.

Eitt af markmiðum Café Lingua er að skapa forvitni um menningu og tungumál og virkja þau mál sem hafa ratað til Íslands með fólki hvaðanæva að og auðgað mannlíf og samfélag. *

Um leið er hugmyndin að beina sjónum borgarbúa að heiminum í kringum okkur.

Vorið 2014 er Café Lingua í samstarfi Borgarbókasafns Reykjavíkur við Stofnun Vigdísar Finnbogadóttur, Háskóla Íslands, Bíó Paradís, Menningarmiðstöðina Gerðuberg og aðra.



Allir eru velkomnir þangað og aðgangur er ókeypis.