Birgir Leifur heldur með Evrópumönnum á Masters

„Þetta er örugglega vinsælasta mótið af þeim fjórum stóru í áhorfi. Það er alltaf spilað á sama vellinum og mikil hefð hefur myndast í kringum mótið,“ segir Birgir Leifur Hafþórsson, fremsti kylfingur þjóðarinnar, um Masters-mótið, fyrsta risamót ársins, sem hefst á Augusta-vellinum í Georgíuríku í dag.

Birgir Leifur er einn af þeim sem lýsa mótinu í beinni útsendingu á Golfstöðinni en sýnt verður beint frá öllum fjórum dögunum. Hann er eðlilega spenntur fyrir mótinu enda oft mikil dramatík í boði á Augusta.

„Fólk sér alltaf sömu holurnar og sömu pinnana og tengir við þetta mót. Svo eru staðir eins og Amen-hornið sem er mjög frægt og alltaf eitthvað sem gerist þar. Menn bíða alltaf spenntir eftir síðustu níu holunum á lokahringnum því það er oft mikil dramatík í gangi. Þetta snýst um að halda sér í formi allan tímann,“ segir Birgir Leifur.

Norður-Írinn Rory McIlroy er talinn sigurstranglegastur fyrir mótið þar sem Tiger Woods er ekki á meðal keppenda í fyrsta skiptið í 20 ár.

„Þessi völlur hentar Rory vel ef hann nær pútternum í gang. Hann er samt ekki búinn að vera að pútta vel að undanförnu. Jason Day líður líka vel á þessum velli og er búinn að lenda nokkrum sinnum í öðru sæti. Hann vill slá frá hægri til vinstri og því er völlurinn góður fyrir Day,“ segir Birgir Leifur, sem býður sjálfur upp á óvænta en skemmtilega spá fyrir mótið.

„Ég vil sjá Evrópumenn gera það gott: Justin Rose, Lee Westwood eða Luke Donald, Ef pútterinn verður heitur hjá Henrik Stensson spái ég honum sigri. Hann verður fyrsti Svíinn til að vinna risamót. Stenson verður minn maður um helgina,“ segir Birgir Leifur léttur að lokum.