Tap í kvöld er enginn dauðadómur

Stjarnan og Valur hefja í kvöld úrslitaeinvígi sitt um Íslandsmeistaratitilinn í Olís-deild kvenna en leikur eitt er klukkan 19.45 í Mýrinni í Garðabæ.

Það hefur verið mikið rætt og skrifað um mikilvægi fyrsta leiks í svona seríu en ef marka má síðustu tvö úrslitaeinvígi hjá konunum þá er það samt enginn dauðadómur að tapa fyrsta leiknum í einvíginu.

Valur (2012) og Fram (2013) töpuðu bæði leik eitt á heimavelli en komu til baka og tryggðu sér titilinn eftir sigur í oddaleik. Á árunum 2009 til 2011 vann sigurvegari fyrsta leiksins hins vegar alltaf titilinn.