Ráðherra gaf loforð um vernd: „Hjördís fór með stelpurnar til Íslands því hún treysti orðum ráðherra“

Aðstandendur Hjördísar Svan Aðalheiðardóttur áttu fund með Hönnu Birnu Kristjánsdóttur innanríkisráðherra skömmu áður en Hjördís ákvað að nema börn sín á brott og fara með þau frá Danmörku og til Íslands. Á fundinum töldu aðstandendur Hjördísar sig hafa fengið fullvissu frá ráðherranum um að börnin yrðu ekki send aftur úr landi. Hanna Birna þvertekur í samtali við Fréttablaðið fyrir að hafa gefið slíkt loforð.

Hjördís var í vikunni dæmd í 18 mánaða fangelsi fyrir ólöglegt brottnám. Þá hefur dómstóll hér á landi komist að þeirri niðurstöðu að börnin þrjú skuli fara aftur til föður síns. Verði það niðurstaðan telur Arndís Ósk Hauksdóttir, prestur og stuðningsmaður Hjördísar, að loforð hafi verið brotið. Arndís sat fundinn með ráðherra og lýsti því sem fram fór í bréfi sem hún hefur meðal annars sent á nokkra þingmenn.

„[Innanríkis]ráðuneytið taldi sig ekki geta aðstoðað Hjördísi við að flýja til Íslands með börnin en ef hún kæmist af eigin rammleik myndi verða stutt við hana, börnunum veitt vernd og þær yrðu ekki sendar úr landi aftur.“

Arndís tengist málinu náið. Hún hýsti Hjördísi og börnin á meðan þau fóru huldu höfði, vikurnar áður en Hjördís fór með þau með einkaflugvél til Íslands. „Hjördís fór með stelpurnar til Íslands því hún treysti orðum ráðherra og að þær yrðu verndaðar frá frekari lögbrotum og ofbeldi,“ segir hún.

„Ég skildi þetta hreinlega þannig að stelpurnar yrðu ekki undir neinum kringumstæðum sendar út aftur. Ég fór sérstaklega til Íslands til að fá fullvissu um að það væri óhætt fyrir Hjördísi að koma heim með börnin en íslenskir dómstólar hafa dæmt að þær skuli aftur til ofbeldismannsins, þrátt fyrir sálfræðiskýrslur og læknisvottorð sem sanna misnotkun." 

Aðspurð segir Hanna Birna þessa lýsingu hljóta að byggja á misskilningi enda hafi aldrei verið gefin fyrirheit um annað en að ráðuneytið myndi beita sér fyrir því að börnin fengju réttláta málsmeðferð ef málið kæmi til kasta þess. Hanna Birna segir ráðuneytið hafa gert allt sem í valdi þess stóð til að tryggja að það gengi eftir. 

„Ráðuneytið hefur talið að á fyrri stigum hafi mál Hjördísar ekki fengið nægilega vandaða málsmeðferð og það hefur eðlilega gengið nærri henni og hagsmunum barnanna,“ segir Hanna Birna. „Ráðuneytið gerði athugasemdir við umrædda málsmeðferð síðastliðið haust og þess vegna var það algjörlega sjálfsagt og eðlilegt að fyrirheit væru gefin um að slíkt myndi ekki endurtaka sig. Og það hefur verið tryggt. Það er ein af ástæðum þess að málið er fyrir dómstólum núna. Á það ferli geta hins vegar hvorki ráðherra né ráðuneyti haft áhrif, en við hljótum öll að vona að niðurstaðan verði farsæl fyrir umrædd börn.“