Fjögur hlutu Nýræktarstyrki 2014

Miðstöð íslenskra bókmennta veitti í gær fjórum nýjum höfundum Nýræktarstyrki til útgáfu á verkum þeirra. Þetta er í sjöunda skiptið sem Nýræktarstyrkjum er úthlutað.



Nýræktarstyrkir eru sérstakir styrkir til útgáfu á nýjum íslenskum skáldskap. Styrkjunum er ætlað að styðja við útgáfu á fyrstu verkum nýrra höfunda og er þar átt við skáldverk í víðri merkingu þess orðs, sögur, ljóð, leikrit, eða eitthvað allt annað. Í ár barst 31 umsókn um Nýræktarstyrki frá 24 aðilum. Verkin sem sótt var um Nýræktarstyrk fyrir eru af ýmsum toga s.s. ljóð, barnaleikrit, smásögur, skáldsögur og esseyjur.



Nýræktarstyrki hljóta að þessu sinni eftirfarandi verk og höfundar: Stálskip, nokkur ævintýri eftir Atla Sigþórsson, Plan B, skáldsaga eftir Guðrúnu Ingu Ragnarsdóttur, Kvíðasnillingarnir, skáldsaga eftir Sverri Norland, og Úlrika Jasmín, skáldsaga eftir Uglu Egilsdóttur.



Á meðal verka og höfunda sem hlotið hafa Nýræktarstyrki síðustu ár eru barnabókin Flugan sem stöðvaði stríðið eftir Bryndísi Björgvinsdóttur, skáldsagan Sláttur eftir Hildi Knútsdóttur, ljóðabókin Á milli okkar allt eftir Heiðrúnu Ólafsdóttur og smásagnasafnið Eldhafið yfir okkur eftir Dag Hjartarson.