Óli Geir sendir frá sér lag í fyrsta sinn

Óli Geir er með mörg járn í eldinum þessa dagana, hann er að gefa út sitt fyrsta lag og hefur samið við þýskt útgáfufyrirtæki. Einnig sér hann um að bóka hljómsveitir fyrir hátíð í Keflavík.

„Ég er er að bóka fyrir helstu staði landsins og er einnig að bóka fyrir Keflavíkurnætur,“ segir athafnamaðurinn Óli Geir. Hann sér um bókanir fyrir hátíðina Keflavíkurnætur sem fer fram í ágúst.

Hann segir hátíðina þó ekki vera í líkingu við Keflavík Music Festival sem haldin var í fyrra en Óli Geir var einn af skipuleggjendum hennar. Fjölmargar hljómsveitir hættu við að spila á hátíðinni því þær töldu skipuleggjendur ekki standa við samninga en hann segir þó að aðrir aðilar komi að Keflavíkurnóttum.

„Ég vona bara að Keflavíkurnætur gangi vel og stækki með árunum og óska aðstandendum hátíðarinnar góðs gengis.“

Þá er Óli Geir einnig búinn að vinna mikið í tónlist og sendi frá sér lagið Flocka á dögunum. „Ég er búinn að sitja á þessu helvíti lengi og er nú að senda frá mér mitt eigið efni í fyrsta sinn.“

Hann hefur gert samning við þýska útgáfufyrirtækið Bang It/Housesession sem felur í sér útgáfu á stökum lögum. „Micha Moor og fleiri virtir plötusnúðar aðstoðuðu mig við að fá samning hjá fyrirtækinu.“

Óli Geir, sem hefur starfað við að skemmta fólki með því að þeyta skífum undanfarin tíu ár, hóf tónlistarferilinn þegar hann hljóp í skarðið fyrir Brynjar Má Valdimarsson á skemmtistað í Keflavík.

„Ég fékk til dæmis Micha Moor til að gefa mér ábendingar, ég sendi honum hugmyndir og hann sagði mér hvað ég mætti bæta. Maður á að vera ófeiminn við að biðja um hjálp.“

Hann er tilbúinn með um tíu lög sem bíða þess að líta dagsins ljós. „Ég er samt ekki að fara að gefa út plötu á næstunni.“ Hann stefnir helst á að gefa út á erlendum markaði. „Ég stefni fyrst á Evrópumarkað en er einnig að vinna efni með íslenskum listamönnum og er til dæmis að vinna með Frikka Dór,“ útskýrir Óli Geir.