Hvað segja neglurnar um þig og heilsuna?

Neglurnar segja mikið um karakter fólks og gefa oft meira til kynna en mann grunar við fyrstu sýn. Eru neglurnar vel snyrtar, nagaðar eða langar og fallegar? Hvað lit notar viðkomandi á neglurnar? Eru þær eldrauðar, svartar eða náttúrulegar? Úr öllum þessum upplýsingum vinnum við og mótum okkur skoðun á viðkomandi manneskju. Neglurnar segja okkur aftur á móti frá fleiru en einungis persónueinkennum. Þær gefa okkur til kynna ýmiss konar heilsufarsleg umhugsunarefni.

Brothættar neglur

Ef þú getur auðveldlega brotið og beygt neglurnar þínar eða ef að þær klofna í gríð og erg gefur það vísbendingu um að þú sért búin að ofgera nöglunum í fínlegheitum. Þig gæti líka skort A-vítamín en það hjálpar líkamanum að vinna úr prótínum, aðaluppbyggingarefni naglanna. Einnig gæti þetta verið C-vítamínskortur eða bíótínskortur en það styrkir neglur og eykur vöxt þeirra.

Slakaðu á naglalakkinu í smátíma og leyfðu nöglunum að jafna sig og athugaðu hvort að ofannefndur vítamínskortur geti staðist.

Gular neglur

Það fyrsta sem manni dettur í hug þegar maður sér gular neglur er áralangt ástarsamband fingranna við sígarettur. Það á þó ekki alltaf við því neglur geta verið gular sökum sveppasýkingar eða annars konar húðsjúkdóms. Ef um sjúkdóm eða sýkingu er að ræða er lausnin að leita til læknis og fá tiltekin lyf við því. Sé guli liturinn aftur á móti ekki af þeim sökum má reyna að dýfa þeim í hreinsi fyrir gervitennur, já, þú last rétt, þessi sem hvíttar gervitennur. Þetta virkar!

Bláar neglur

Blár litur naglanna er oft tengdur við lélegt súrefnisflæði eða vandamál í lungum og þá sérstaklega ef fingurnir eru að auki alltaf kaldir. Sumir hafa þó einfaldlega hægara blóðflæði en aðrir og gæti það einnig verið ástæðan. Það borgar sig að fá það staðfest hjá lækni ef neglurnar eru bláar að lit til lengri tíma.

Hvítir blettir

Yfirleitt eru hvítir blettir á yfirborði naglarinnar ekkert til þess að hafa áhyggjur af. Líklegasta skýringin er sú að nöglin hafi rekist í. Hvíta blettinn má þá skýra út sem léttan marblett. Ef bletturinn hangir á nöglinni svo vikum skiptir er mál að leita til læknis og skoða hann frekar.