Kaymer í forystu í Abu Dhabi en McIlroy ekki langt undan

Rory McIlroy hefur keppnistímabilið mjög vel en eftir tvo hringi á HSBC meistaramótinu í Abu Dhabi er þessi besti kylfingur heims í þriðja sæti á 11 höggum undir pari. Þá á McIlroy ekki eftir að gleyma upphafshöggi sínu á 15. holu á öðrum hring í dag en hann fór holu í höggi í fyrsta sinn á ferlinum í atvinnumannamóti.

McIlroy er ekki sá eini sem hefur farið holu í höggi í Abu Dhabi en Spánverjinn vinsæli, Miguel Angel Jimenez, gerði slíkt hið sama í gær og fagnaði á sinn einstaka hátt.

Það er hins vegar Þjóðverjinn Martin Kaymer sem leiðir mótið en hann hefur leikið frábært golf og er á 13 höggum undir pari eftir hringina tvo. Í öðru sæti kemur belgíski kylfingurinn Thomas Pieters á 12 undir pari en hann er af mörgum talinn vera einn af efnilegustu kylfingum Evrópumótaraðarinnar.

Á PGA-mótaröðinni fer Sony Open fram á Hawaii en Webb Simpson og Paul Casey léku fyrsta hring á 62 höggum og deila þeir forystunni á átta höggum undir pari. Jason Day, Matt Kuchar og Camilo Villegas léku einnig vel á fyrsta hring og eru á meðal efstu manna en margir af sterkustu kylfingum PGA-mótaraðarinnar hefja keppnistímabil sitt um helgina.

Bæði HSBC meistaramótið og Sony Open eru í beinni útsendingu á Golfstöðinni en útsendingartíma má nálgast hér.