Sjáðu Beckham setja magnað heimsmet

Hinn ótrúlega útherji NY Giants, Odell Beckham Jr., gerði sér lítið fyrir og komst í heimsmetabók Guinness í gær.

Þá greip hann 33 sendingar með annarri hendi á aðeins einni mínútu. Það var Drew Brees, leikstjórnandi New Orleans Saints, sem kastaði til hans.

„Hann kastaði bara fullkomnum sendingum til mín," sagði Beckham.

VISA var að endurgera auglýsingu frá því fyrr á tímabilinu er Brees og fleiri köstuðu til Larry Fitzgerald, útherja Arizona.

Það var aftur á móti auglýsing en nú var þetta allt gert af fullri alvöru. Til þess að metið fengist staðfest varð að kasta af tíu metra færi. Þeir félagar náðu metinu strax í fyrstu tilraun en hefðu mátt fá fleiri.

„Þetta er ótrúlegt. Þessi strákur grípur allt sem kemur til hans," sagði Brees en þetta gekk svo hratt að þeir urðu uppiskroppa með bolta og varð Beckham að kasta boltum til baka á Brees.

Beckham varð að ofurstjörnu í vetur er hann átti eitt flottasta grip í sögu NFL-deildarinnar.