Meira bókað en söluaðilar áttu von á

Flestir söluaðilar veiðileyfa voru búnir að gera ráð fyrir því að það yrði minna bókað af veiðileyfum fyrir komandi sumar vegna aflabrests í fyrra.

Þetta er ekki alveg að ganga eftir og virðist t.d. sem innlendir veiðimenn séu að bóka meira en veiðileyfasalar áttu von á í kjölfar aflabrests í fyrra.  Líkleg skýring sé að engin geri ráð fyrir því að það geti komið tvö afleit sumur í röð og í ef aflatölur síðustu áratuga eru skoðaðar þá hefur það aðeins gerst með afgerandi hætti í eitt skipti en engu að síður hafa komið tvö róleg sumur saman en ekkert í líkingu við árið í fyrra.  Almennt gætir mikillar bjartsýni með sumarið 2015 og endurspeglast það í góðum bókunum.

Nokkrar ár eru þegar uppseldar og vinsæl veiðisvæði í öðrum ánum að verða fullbókuð.  Má þar nefna svæði 1-2 í Stóru Laxá en haustdagarnir þar eru samkvæmt heimildum löngu farnir og færri fengu en vildu og það eru sárafáir dagar eftir á því svæði í júní og júlí.  Þetta á við um margar árnar og ljóst að lítið eða ekkert af dögum eru eftir í Víðidalsá, Vatnsdalsá, Miðfjarðará, Laxá á Ásum, Húseyjakvísl og Hafralónsá.  Erlendir veiðimenn hafa af sama skapi bókað mikið fyrir næsta sumar og þeim á líklega eftir að fjölga enn frekar á komandi árum þegar og ef veiðitölur fara að nálgast það sem kallast má eðlilegt á veiðiári.