Retief Goosen leiðir með tveimur höggum fyrir lokahringinn á Riviera

Retief Goosen er í kjörstöðu til þess að tryggja sér sinn áttunda titil á PGA-mótaröðinni á ferlinum í kvöld en fyrir lokahringinn á Northern Trust Open hefur þessi tvöfaldi US Open sigurvegari tveggja högga forskot á næsta mann.

Gengi Goosen á undanförnum árum hefur alls ekki verið gott en hann hefur ekki sigrað í atvinnumóti í golfi í sex ár og síðan að hann fór í bakaðgerð fyrir tveimur árum hefur hann átt sérstaklega erfitt uppdráttar.

Hann er á átta höggum undir pari eftir hringina þrjá á Riviera vellinum en Kanadamaðurinn Graham DeLaet kemur einn í öðru sæti á sex höggum undir pari.

Þá eru margir sterkir kylfingar sem eru í stöðu til að blanda sér í baráttuna um sigurinn í kvöld en þar má helst nefna Sergio Garcia á fimm höggum undir pari og Jordan Spieth, Jim Furyk, Dustin Johnson og Bubba Watson á fjórum undir.

Lokahringurinn á Northern Trust Open verður í beinni útsendingu á Golfstöðinni og hefst útsending klukkan 18:00.