Loksins fleiri vötn að taka við sér

Kuldinn virðist ekkert ætla að láta undan orðrómnum um að samkvæmt dagatalinu sé komið sumar og það á að vera kalt alla vega í 7-10 daga í viðbót.

Þetta er auðvitað ferlega slöpp veðurspá og hefur þessi kalda sumarbyrjun slegið á marga veiðimenn sem hafa ekki einu sett saman stöng ennþá.  Á Þingvöllum er kropp, og ekkert meira en það, í urriðaveiðinni og ástæðan fyrir því er bara hitastigið á vatninu sem er svipað og það er venjulega um mars/april.  Þeim hefur farið snarfækkandi veiðimönnunum sem fara upp að Þingvallavatni til að freista stóru urriðana enda rennur fljótt af mönnum þrótturinn þegar 4-5 skipti skila engu í háfinn.

Þó eru góðar fréttir líka inná milli og til að mynda virðist Sauðlauksvatn vera komið á kortið en Jón Sigurðsson var þar á veiðum í dag og það virðist sem hann hafi hitt á hárrétt vorskilyrði.  Það var logn, heiðskýrt og hlýrra en hefur verið upp á síðkastið og líklegt er að það hafi ýtt fiskinum í gang.  Eins og sést á meðfylgjandi mynd er þetta flott veiði í dag hjá Jóni og þetta er vonandi undanfarinn á því að fleiri vötn séu að koma undan ís og vetri með góðum veiðidögum.