Bleikjan farin að taka í Hraunsfirði

Hraunsfjörður er eitt vinsælasta bleikjusvæði vesturlands og það er heldur ekkert skrítið því þarna er bleikjan bæði væn og og oft mikið af henni.

Það er þó oft erfitt að fá hana til að taka þannig að dagsskammtur af þolinmæði þarf oftar en ekki að vera með í för þegar rennt er í vatnið.  En eins og venjulega launar þolinmæðin oft vel og þeir sem hafa verið duglegir við vatnið oftar ekki ekki fengið einn af þessum gullnu dögum þegar allt gengur upp og eftir liggja fallegar bleikjur á bakkanum.

Veiðikortið greindi frá veiðimanni sem gerði góðan dag í Hraunsfirði en hann heitir Guðmundur Aron Guðmundsson.  Hann er búinn að kíkja í Hraunsfjörðinn í tvígang og stoppað í um 1-2 tíma í hvort skipti. Í bæði skiptin hefur hann fengið tvær fínar bleikjur og hefur hann helst verið að fá þær á flugu sem heitir Héraeyra. Allir þessir fiskar tóku eftir að hann hafði séð bleikjur vaka og þá kastaði hann á þann stað og bingó!  Bleikjan er í það minnsta mætt á svæðið þannig að það verður spennandi að fylgjast með næstu daga og vikur enda er fyrrihluti sumars góður tími í Hraunsfirði.

Um leið og það fer að hlýna aðeins meira fer veiðin samhliða því að aukast í Hraunsfirði svo það má reikna með aukinni umferð veiðimanna þar næstu vikurnar og þá er líka eins gott að vera kominn tímanlega til að komast að á bestu stöðunum.