Óþekktur Svíi efstur á Memorial

Svíinn David Lingmerith leiðir þegar að Memorial mótið er hálfnað en eftir tvo hringi á Muirfield vellinum er hann á 12 höggum undir pari.

Fyrrum PGA-meistarinn Jason Dufner virðist vera að finna sitt gamla form aftur en hann er í öðru sæti á 11 höggum undir pari.

Dufner átti einnig tilþrif gærdagsins en hann fór holu í höggi á 16. holu sem er 180 metrar að lengd.

Aðstæður voru fullkomnar til þess að skora vel á öðrum hring og það sást en margir sterkir kylfingar eru toppbaráttunni, meðal annars næst besti kylfingur heims, Jordan Spieth, sem er á sex höggum undir pari.

Tiger Woods er meðal þátttakenda um helgina en hann rétt náði niðurskurðinum og er á einu höggi undir pari eftir hringina tvo.

Hann þarf því að leika vel í dag til þess að blanda sér í baráttu efstu manna en bein útsending frá þriðja hring hefst á Golfstöðinni klukkan 16:30 í dag.