Vindurinn í aðalhlutverki á St. Jude Classic

TPC Southwind völlurinn í Memphis hefur svo sannarlega staðið undir nafni á St. Jude Classic mótinu en fyrir lokahringinn leiða Englendingurinn Greg Owen og Argentínumaðurinn Fabian Gomez á níu höggum undir pari.

Mikill vindur hefur gert keppendum erfitt fyrir að skora vel en einkenni TPC Southwind eru einmitt að tíðir sviftivindar eru ríkjandi á svæðinu.

Bandaríkjamennirnir Scott Brown og Brooks Koepka deila þriðja sætinu á átta höggum undir pari en nokkrir kylfingar eru á sex og fimm höggum undir pari sem geta blandað sér í baráttuna um sigurinn í kvöld.

St. Jude Classic mótið er það síðasta í röðinni fyrir US Open sem hefst í næstu viku og því taka margir af bestu kylfingum heims sér frí um helgina.

Phil Mickelson er þó á meðal keppenda en hann er á þremur höggum undir pari, jafn í 19. sæti og verður að eiga frábæran lokahring til þess að gera atlögu að efstu mönnum.

Lokahringurinn verður í beinni útsendingu á Golfstöðinni í dag og hefst hún klukkan 17:00.