Fara af stað út í óvissuna: Flóknasta sjónvarpsútsending Íslandssögunnar

„Við erum öll ótrúlega spennt, þetta er verkefni sem byrjaði sem grínhugmynd en þróaðist svo út í þetta,“ segir Gísli Berg, framleiðslustjóri Stöðvar 2.

Stöð 2 Sport og Vísir mun sýna frá og fjalla um Wow Cyclothon hjólreiðakeppni þar sem hjólað er í kringum Ísland og áheitum safnað til styrktar uppbyggingar Batamiðstöðvar á Kleppi.

Útsending mun hefjast á Stöð 2 Sport klukkan 18.50 í kvöld og standa sleitulaust til fimmtudagsins 25. júní þegar fyrstu tíu manna liðin koma í mark.

„Þó svo að við tókum ekki endanlega ákvörðun fyrr en í lok síðustu viku þá hefur allt skipulag gengið mjög vel. Við finnum fyrir miklum áhuga á þessu verkefni og við vonumst til þess að gera verið sem lengst í loftinu.“

Gísli segir að teymið mun fara yfir svæði á landinu þar sem er ekki einu sinni farsímasamband.

Sjá einnig: Verða á skjánum í tvo sólarhringa

„Þá geri ég ráð fyrir því að við verðum ekki með mynd í hús alla leiðina og munum líklega detta sumstaðar út, það er bara spurning hversu oft og hversu lengi,“ segir Gísli og bætir við að Austurlandið og heiðarnar verði líklegast erfiðastar.“



„Það má segja að við séum með fjögur mismunandi tæknisambönd í hús í gegnum farsímakerfi símafélagana sem við reynum að skipta á milli eftir bestu gæðum hverju sinni og síðan þegar allt bregst þá verðum við með talstöðvasamband sem fer í gegnum Tetrakerfið.“