Þrír í forystu fyrir lokahringinn á Opna breska

Það stefnir allt í einn mest spennandi lokahring á Opna breska meistaramótinu í langan tíma á morgun en eftir 54 holur á St. Andrews eru 26 kylfingar á innan við fimm höggum frá efsta sætinu.

Þrír deila efsta sætinu á 12 höggum undir pari en það eru þeir Louis Oosthuizen, Jason Day og áhugamaðurinn Paul Dunne.

Dunne er aðeins 22 ára gamall og hefur spilað frábært golf hingað til en hann freistar þess að verða fyrsti áhugamaðurinn til þess að sigra á Opna breska meistaramótinu síðan árið 1930.

Jordan Spieth er einn í fjórða sæti, höggi á eftir efstu mönnum á 11 höggum undir pari en hann gæti líka komið sér í sögubækurnar með sigri á morgun og orðið fyrsti kylfingurinn síðan árið 1953 til þess að vinna fyrstu þrjú risamót ársins.

Reynsluboltinn Padraig Harrington kemur einn í fimmta sæti á tíu höggum undir pari en margir eru jafnir á níu undir, meðal annars Adam Scott, Justin Rose og Sergio Garcia.

Lokahringurinn á morgun verður í beinni útsendingu á Golfstöðinni en stöðuna í mótinu má sjá hér.