Sú markahæsta framlengir við Selfoss

Hrafnhildur Hanna Þrastardóttir, stórskytta Selfoss í Olís-deild kvenna í handbolta, er búin að framlengja samning sinn við félagið til tveggja ára.

Þetta kemur fram í fréttatilkynningu sem Selfoss sendi frá sér í kvöld, en Hrafnhildur Hanna hefur allan sinn feril spilað með Selfossi.

Þessi unga og öfluga skytta sló í gegn í Olís-deildinni síðasta vetur, en hún endaði mótið sem markahæsti leikmaður deildarinnar með 159 mörk.

Hún var valinn í A-landslið Íslands fyrr á árinu og átti nokkra mjög góða leiki með því.

Selfoss byrjaði Olís-deildina um helgina með flottum sigri á útivelli gegn Haukum þar sem Hrafnhildur skoraði sjö mörk.

„Stjórn handknattleiksdeildar fagnar þessari ákvörðun Hönnu og bindur miklar vonir við að enn aukinn kraftur muni færast í starf deildarinnar,“ segir í fréttatilkynningu Selfyssinga.