Leitinni að El Faro hætt

Skipulagðri leit að flutningaskipinu El Faro, sem saknað hefur verið eftir að fellibylurinn Joaquin reið yfir Bahamaeyjar í síðustu viku, hefur verið hætt. Bandaríska strandgæslan hefur fundið lík eins skipverja en alls voru þrjátíu og þrír innanborðs, sem allir eru taldir af. Þá hefur eitthvað brak fundist, sem og björgunarvesti og gámur.

Flutningaskipið var á leið frá Jacksonville í Flórída til San Juan í Puerto Rico þegar feillibylurinn gekk yfir. Áhöfnin sendi neyðarkall þegar skipið var um 56 kílómetrum norður af Crooked eyju í Bahama, en þá var skipið byrjað að missa afl og mikið vatn farið að safnast á því. Sambandið rofnaði svo við skipið sökum veðurs. Þá gekk leit að skipinu afar illa sökum ölduhæðar.