Sterkar vísbendingar um íkveikju í Írabakka

Einn var fluttur á slysadeild vegna reykeitrunar og þrettán til viðbótar þurfti að bjarga niður af svölum þegar eldur kom upp í þriggja hæða fjölbýlishúsi við Írabakka í Breiðholti í nótt.

Allt tiltækt slökkvilið var kallað út á þriðja tímanum í nótt. Þegar fyrstu liðsmenn mættu á vettvang lagði þykkan svartan reyk upp úr kjallaranum og upp allan stigaganginn.

Reykkafarar fóru þegar niður í kjallarann og réðust gegn eldinum sem logaði glatt. Aðrir liðsmenn reystu stiga utan á húsinu og ferjuðu fólk niður af svölum. Gekk það áfallalaust fyrir sig.

Sex íbúðir eru í húsinu en búið er í fimm þeirra. Strætisvagn var kallaður á vettvang sem mætti á svæðið innan stundar. Naut fólk skjóls þar og aðstoðar frá Rauða Krossinum.

Ógnaði lífi og limum fólks

Einhver reykur barst inn í næsta stigagang, en íbúar þar þurftu ekki að yfirgefa híbýli sín. Rafmagn fór af báðum stigagöngunum. Slökkvistarfið sjálft gekk vel en það var ekki fyrr en á fjórða tímanum sem slökkviliðsmenn höðu lokið við að reykræsta íbúðirnar sex. Íbúarnir þurftu að gista annarsstaðar í nótt.

Ljóst er að mikið tjón hefur orðið, einkum af völdum sóts, og er mikið hreinsunarstarf framundan. Eldsupptök eru ókunn en eldurinn virðist hafa kviknað á bak við læsta hurð í kjallara.

Að sögn Heimis Ríkharðssonar í rannsóknadeild lögreglunnar eru sterkar vísbendingar um íkveikju en enginn sérstakur liggur þó enn undir grun. Hann segir málið litið mjög alvarlegum augum enda hafi viðkomandi ógnað lífi og limum fólksins í húsinu.

Hér neðst má svo sjá myndir sem Pjetur Sigurðsson, ljósmyndari Fréttablaðsins, tók nú í hádeginu.