Málþing um Milan Kundera

Málþing um verk Milans Kundera verður haldið á morgun, laugardag í stofu 101 í Odda. Frummælendur eru Jón Karl Helgason, prófessor í íslenskum bókmenntum síðari alda, Steinunn Sigurðardóttir rithöfundur og Torfi H. Tulinius, prófessor í íslenskum miðaldafræðum.

Milan Kundera er tékknesk-franskur. Hann á að baki langan og glæsilegan rithöfundarferil og verk hans hafa verið gefin út á um 50 tungumálum, þar á meðal íslensku.

Sérstakur gestur málþingsins er François Ricard, háskólakennari við McGill-háskóla í Montréal í Kanada, sem hefur skrifað fjölda greina og bóka um Kundera, Friðrik Rafnsson þýðandi ræðir við hann. Í lokin mun Auður Aðalsteinsdóttir, bókmenntafræðingur og ritstjóri Hugrásar, hefja almennar umræður

Ástráður Eysteinsson, forseti Hugvísindasviðs HÍ, stjórnar málþinginu sem haldið er af Stofnun Vigdísar Finnbogadóttur, Bókmennta- og listfræðastofnun Háskóla Íslands og Forlaginu. Það stendur frá 14 til 17. Aðgangur er ókeypis og öllum opinn.