Sá hlær best sem síðast hlær

NY Jets rak Rex Ryan. Stuðningsmenn Jets brenndu pappamynd af honum fyrir leik en Ryan gekk af velli með bros á vör í gær.

Þá snéri þessi skrautlegi þjálfari aftur til New York en hann var rekinn frá Jets eftir síðasta tímabil. Hann þjálfar núna Buffalo Bills sem vann leik liðanna, 22-17.

Ryan hefur gert í því í vetur að reyna að fara í taugarnar á Jets. Nældi í leikmanninn sem kjálkabraut leikstjórnanda Jets fyrir tímabilið og gerði hann svo að fyrirliða í gær. Það fór ógurlega í taugarnar á Jets-mönnum.

Ryan reyndi ekkert að leyna því eftir leik að sigurinn skipti hann persónulega miklu máli.

„Þetta var virkilega fullnægjandi sigur," sagði Ryan og brosti allan hringinn. „Þetta er svolítið eins og þegar manni er sparkað af stelpu sem maður er skotinn. Hún vill stundum fá þig til baka en fær það ekki."