Síðasta helgin til rjúpnaveiða framundan

Síðasta helgin þar sem leyfilegt er að ganga til rjúpna byrjar á morgun og má búast við fjölmenni á fjöllum.

Það á kannski mest við um þau svæði sem eru í klukkutíma, og rétt rúmlega það, akstursfjarlægð frá Reykjavík og skyttunum fækkar snarlega þegar lengra er komið frá bænum. Veðurspáin er hliðhöll veiðimönnum en það spáir fínu veiðiveðri um allt land nema hluta úr degi á norðausturlandi þar sem það gæti verið smá slydda og rigning.

Veiðin á þessu tímabili er búin að vera ágæt og mikill meirihluti þeirra veiðimanna sem Veiðivísir hefur heyrt frá búnir að ná í jólamatinn. Það hefur verið haft á orði að mun meira hafi sést af fugli núna en í fyrra og á það við um allt landið nema helst vestfirði þar sem líklega minnst hefur veiðst á tímabilinu. Veiðin hefur verið góð á austur og norðausturlandi og má reikna með góðum straum veiðimanna á þau svæði um helgina enda virðist vera mikið af rjúpu og nægt er plássið til að ganga á.

Þeir sem eru vanir veiða auðvitað oftast best en því fylgir auðvitað mikil reynsla. Við ætlum að gefa nýliðum á rjúpnaslóðum eitt gott ráð um helgina. Farðu upp í snjólínu, leitaðu vel í giljum og í kringum urðir. Góða veiði.