Phelps vildi ekki lifa lengur

Líf sigursælasta Ólympíufara allra tíma, Michael Phelps, breyttist mikið í lok september árið 2014 og hann féll í kjölfarið í mikið þunglyndi.

Hann var þá tekinn fyrir ölvunarakstur. Hans þriðja brot á innan við tíu árum. Á þessum tíma hafði þessi ótrúlegi íþróttamaður misst stjórn á lífi sínu.

„Ég hafði lifað í ótta um að fá símtal að eitthvað hafði gerst. Miðað við ástandið á honum þá átti ég von á því að hann myndi drepa sig. Ekki með sjálfsvígi heldur með því að keyra fullur með skelfilegum afleiðingum," sagði Bob Bowman, þjálfari Phelps, er hann rifjar upp kvöldið er hann fékk símtal um að Phelps hefði verið handtekinn.

Í kjölfarið hittist nánasta fjölskylda Phelps heima hjá honum sem og NFL-stjarnan fyrrverandi, Ray Lewis, en hann er mikill vinur Phelps. Þau héldu þar til og veittu Phelps stuðning á meðan her fjölmiðlamanna hafði tjaldað fyrir utan húsið.

Ray Lewis las honum pistilinn

Phelps fór ekki út úr húsi í fjóra daga og viðurkennir í viðtali við Sports Illustrated að hann hafi verið í erfiðum málum.

„Ég var á afar dimmum stað og vildi ekki lifa lengur," segir Phelps en hann var þakklátur fyrir stuðninginn sem hann fékk frá sínu fólki á þessum tíma. Sérstaklega Lewis sem tók hann hraustlega í gegn.

„Ég gaf honum það hrátt. Hann fékk að heyra ískaldan sannleikann frá mér. Ég spurði hann einfaldlega hvað í fjandanum hann væri að gera við líf sitt," segir Lewis og Phelps staðfestir að hafa fengið svakalega ræðu frá Lewis. Hann er einmitt frægur fyrir hvetjandi ræður sínar.

Viku síðar samþykkti Phelps að fara í meðferð og byrja að byggja sig upp andlega á nýjan leik. Systir hans segir að Phelps hafi verið eins og hræddur smástrákur á leiðinni í meðferðina. Við lendingu var hann einn.

„Ég þurfti að skila símanum mínum og fara inn á herbergið mitt. Ég hef aldrei verið jafn hræddur um ævina," sagði Phelps.

45 dögum síðar var hann aftur kominn ofan í sundlaugina. Smám saman fann hann gleðina og taktinn á ný þó svo hann væri í banni og mætti ekki taka þátt á HM. Hann hefur aftur á móti synt á tímum í ár sem hefði skilað honum þremur gullverðlaunum á HM.

Tekur ekki einn sopa af áfengi fram að ÓL

Phelps virðist vera hamingjusamur maður í dag. Hefur ekki misst úr æfingu og ætlar ekki að drekka einn bjór fyrr en Ólympíuleikunum lýkur í ágúst á næsta ári. Hann á sér nýtt markmið og það er að fara á ÓL í Ríó og bæta við fleiri verðlaunum. Hann hefur þegar unnið 22 verðlaun á ÓL. Þar af á hann 18 gull. Þetta eru met sem verða seint slegin.

„Ég hef ekki tekið einn sopa af áfengi og það kemur ekki fyrir að ég missi af æfingu þar sem ég er þunnur. Ég mun ekki drekka einn sopa fyrir leikana. Líkamsfitan hefur hrunið niður hjá mér og ég er grennri en áður. Árangurinn hefur verið að koma því ég hef aldrei hugsað eins vel um sjálfan mig," segir Phelps.

Sundþjálfarar í Bandaríkjunum sem hafa fylgst með Phelps segja að ástand hans sé það gott að hann eigi enn eftir að bæta sig. Hann muni bæta eigin heimsmet á komandi mánuðum.

Það bendir því flest til þess að tólf árum eftir að hann tók fyrst þátt á Ólympíuleikum muni hann mæta til leiks sem sá sigurstranglegasti í að minnsta kosti þrem greinum. Hann verður þá orðinn 31 árs gamall en enginn sundmaður yfir þrítugu hefur unnið til verðlauna á ÓL.